N°8 :
AUTRE
Sur l'air : De Monteron, que vous êtes cruelle de quitter ainsi vos amans, etc…
Ma fai, Minnia, z'é bin vioeu de berzires,
Avoé lioeu berzis sty matin,
Que corrivan lo lon de le sarires,
Vé la granze à Piarro Martin ;
Z'é demando vai que l'alovan fore
L'on répondu : no van vai la Commore.
Ze ne povai me beuto à la téta,
Qué Commore l'alovan vai ;
Z'é bin connioeu qu'y-ave greussa féta,
Quan z'y é vioeu alo trai Rays,
Don lou sevau fasan mé de poeussire
Qon for à chau ne fa po de feumire.
Lo Ray qu'ave lo pai blan comman neze,
Li porti d'our mé d'on quinto ;
Choeutie qu'ave lo gron nai comman peze,
D'ansan qu'on brule su l'auto,
L'autro porti d'ongan na plein eguire,
Per engraïche ché qu'on bete à la bire.
On bon Zanti li porti per uffranda,
On petié corcé de coton ;
L'otro porti de gan fai à la flanda
To garni de pai de moeuton ;
Lo pouvre éfan n'u jamé ce grand zoïe
Que quant i viu tan de brove zinzoïe.
Ze ne savai po ran tro coman tore
Sans on vieillar mon beun ami,
Que me creyi d'upré de la commore,
N'ête vo po de san Remy ?
Oay mon parin ; mé ze sé bin en pinna
Per choeu motet don ze n'é po l'étrinna.
Veni, veni fore la reverence,
E prèyé la More de Di,
Que vo balie de bin en abondance,
E à la fin son paradi.
En m'aprossan, lo Fi me fi gran féta,
E m'a balia de la man su la téta.
© 2007 - 2009, Cadole. Tous droits réservés.
|
|
|
|
|