N°7
Autre de Jasseron.
Sur l'air : Que vot-oyi na novala.
Que vot-oyi na novala
Que los Anze ont apporta,
La plu beuna, la plu bala,
Qu'on n'aye jamé conta.
Choeu fi que neutron vioeu pare
Ave se gran fan de vay,
Marion vin de lof are,
Vé le fauborg de belay.
Dedan na méchanta granze,
Que n'a ni mur ni paray,
Meraveille bin étranze !
E naqui lo Ray dé Ray.
La More de Di poeussala,
Assetou qu'ele l'a vioeu
L'envelope en sa gonala,
Per fauta de couvertioeu.
Héla le ne pa se resse,
D'avai on cruet per l'Efan,
Le lo bete dan la cresse,
Dessu on petion de fan.
Lo bon José que reguètie
Comman y grele de frai,
Va détassé deuve bêtes,
Per veni soffla seu dai.
Lo bon Colon s'azenolie
D'acouta lui per honioeu,
L'ano fa de ses orelies
La fêta à neutron Seignoeu.
Los Anzo menon d'aubades
Per les air, tot à l'entor,
Los berzi font de ganbades
To lo valan de fauborg,
Pren me chala corda, tire,
Sonna per faire veni,
Chelou de la caronire,
E lo compare Deni.
Chétie de le Combe modon,
I vegnon avar chautan,
Choeu de san Ju ne s'en modon,
Que quan la chevr'a mau tan.
Faray vo torzo la cagne,
Ne vo leverai vo pay,
Coitie-vo gen de la Chagne,
E de la Truchire avoy.
Oyi lo son de la closse,
Butavo tui per semin,
Mé ne subla pa la frosse
De monsu Jean Guillermin.
Bertran attige lo Ciro,
E me cria : ché Jasars
Que son per lo cemetiro ;
Chanta Monsu Batasar.
Entra, vo que sète lire,
Per répondre de la scia,
E tai, Liaudo de Boissire,
E Pernot l'enroyassia.
Prian l'Efan é la More,
Que gardan bin neutron Ray ;
Ché que li voeudron mo fore,
Mala terra lo viray.
Minnia se no veulian craire,
Lo bon pare tan prona,
Nos aran proeu vin à baire,
E torzo de quay dinna.
E ne no faudra zin craindre,
Ne garra ne carabin,
Pertan qu'on se veulie rendre,
On pou tretui zens de bin.
© 2007 - 2009, Cadole. Tous droits réservés.
|
|
|
|
|