N°6
Zona en garden mou moeuton
Z'é entendu na novala,
Z'é entendu é pi zey vioeu
Des Anzo na tropa bala,
Que chantovan
Per lo paï, que lo bon Di
Se fet éfan,
Per no mettr'en paradi.
Chela novala me surpran,
Lisa ma beuna commore,
E ze ne veio po comman,
To santie se pou fore ;
A la minai,
Dere qu'na Vierze a fai
On bio garçon,
San surpasse la réson.
Cray me z'entendit en felan,
Chela beuna é la bala novala,
Que ceta né se fet n'Efan,
De Maria la poeussala,
Voeute veni,
Nos iran lo rézoyi,
En li deïan
Una sanson su lo fan.
To dray que ze lu entendu,
Ze levi la téta draite,
E z'arai croeu d'être perdu,
San lo secor de Benaite,
Que te coniai,
Que me desi per sa fai,
Que l'ave vioeu
A la minai lo Seloeu.
E per me lo fore mioeu vai,
Le me meni dans l'étoblo,
U ze vî lo premi des Rais,
Dan n'état se miséroblo :
Qu'et-ou don san ?
Lo bon Di dessu lo fan.
E que n'a po
On cruet per se grotto ?
En regardant choeu bal éfan,
Ze vi bin qu'y clartiove,
E de la téta é de la man,
Lo semin i no montrove ;
De bian sofri,
Per alo en parade,
Per l'imito,
E fo bian sofri de mo.
Ze te veuliay veni creio,
Quan de Ray ze vi na banda,
To dray qu'i furont arrevo,
I firon n'a bal'ufranda;
De biau présan,
Que sentivan bon l'ansan,
De mirr'é dour,
Per li reveni lo cour.
Parla, vœu-te po te levo,
E veni avoé la Zona ?
Z'é de graffo per y porto,
E de taila mé de n'ona,
Per lo creuvi :
Se te vezé, lo mon Di !
E n'y a ran
Qu'na cresse épi de fan.
La Maria é deza lon
Avoé Tienna é la more,
E l'on porto on bio moeuton,
Per uffri à choeu bon pore,
Que voeudre tui,
No betto en paradi,
I vœu devan
Qu'on l'adorai su lo fan.
E nos y fo tote modo,
E deza per le sarires,
Lo mondo é tot épado,
E ne sonze ran qu'à rire :
Mé lo per may,
Se ze vai choeu bio Ray,
É ne sera
Que per ploeuro mou péchai.
L'isabio to dray en entran,
Commanchi nab ala feta,
A l'honieu de choeu bal Efan,
Qu'é venu san zin de reta,
Per no sarvo,
E li en a su se bon gro,
Qu'i li desi
Qu'i la mettr'en paradi :
La Zona santi brovaman,
E fi seigno de la téta,
A la Louisa en s'en modan,
De bian porsuivre la féta ;
E la Maria,
Aporti son grou bordon,
Que l'égreia
Per lo mettre su lo ton.
La more é tote le seroeu,
Y aliron d'una banda,
Per adoro choeu bio Seignoeu,
É li fore un'uffranda,
De covertioeu,
Tui brovaman trava ila
Per choeu Seignoeu,
Que le viront ébollia.
Helo ! drai que choeu bal éfan
U rechoeu lioeu broy'uffranda
I lioeu fi segnio de la man,
Que lioeu bonto ére granda ;
E que per san,
I l'aran dan son palé,
Dan pou de tan,
Una place per jamé.
© 2007 - 2009, Cadole. Tous droits réservés.
|
|
|
|
|